फुर्सदमा तीन नायिका

कुनै वेलाका व्यस्त नायिका रेजिना, पूजना र उषा अहिले फिल्मविहीन छन्

कुनै वेला हातैभरि फिल्म भएका कलिउडका तीन नायिका अहिले फिल्मविहीन छन् । रेजिना उप्रेती, पूजना प्रधान र उषा पौडेललाई केही वर्षअघि भ्याई-नभ्याई थियो । तर, अचेल उनीहरूको हात खाली छ ।

निर्देशक युवराज लामाको खानदान फिल्ममा सहनायिका भई ठूलो पर्दामा प्रवेश गरेकी रेजिना उप्रेतीले पाँच दर्जन फिल्ममा अभिनय गरिन् । तर, अहिले उनीसँग एउटा पनि फिल्म छैन । 'मैले ६० वटा फिल्म खेलेँ, तर सन्तुष्टि मिलेन,' आफ्नो हातमा फिल्म नहुनुका कारण खोल्दै रेजिना भन्छिन्, 'जस्तो पायो त्यस्तै फिल्ममा अभिनय गर्ने मन मर्‍यो । त्यसैले अचेल म चुजी भएकी छु ।' रेजिना रोल र पारिश्रमिक चित्त नबुझेका कारण अफर आएर केही फिल्म छाडेको बताउँछिन् । भन्छिन्, 'म अब छानेर मात्र फिल्म खेल्छु । संख्या बढाएर मात्रै केही नहुने अनुभव गरिसकेकी छु ।' रेजिनाको अब आफैँ फिल्म निर्माण गर्ने योजना छ । 'राम्रो रोल तथा भनेजति पैसा पाएमात्रै फिल्म खेल्छु । नत्र आफैँ फिल्म बनाउँछु,' उनले योजना सुनाइन् । त्यसो त उनले फिल्म निर्माण गर्ने हल्ला चलेको धेरै भयो । नाम पनि घोषणा गरेकी थिइन्- जंगवीर । जंगवीर घोषणाभन्दा अघि बढ्न सकेन । अब भने साँच्चै फिल्म निर्माण गर्न कस्सिएको बताउँछिन् उनी । अचेल आफूले निर्माण गर्ने फिल्मको कथा सोच्नै व्यस्त भएको कथन उनको छ ।

निर्देशक नरेश पौडेलको हिरो फिल्मबाट हिरोइन बनेकी पूजा -अहिले पूजना) प्रधानको हातमा पनि कुनै फिल्म छैन अहिले । अध्यात्ममा लागेकाले निर्माताले आफूलाई फिल्म अफर गर्न छाडेको उनको ठम्याइ छ । झन्डै दुई दर्जन फिल्ममा अभिनय गरे पनि गतिलो भूमिका भने उनलाई पनि मिलेन । उनले अलि राम्रो भूमिका पाएको अभिमन्यू र आँधी-तुफान पनि असफल भए । उनी अभिनीत पापी मान्छे-२ उपत्यकाबाहिर प्रदर्शन भए पनि उपत्यकामा भने प्रदर्शन भएको छैन । उनले धेरै आशा गरेको फिल्म हो- पापी मान्छे-२ । अंगप्रदर्शनमा माहिर मानिने पूजना आफूमा भएको प्रतिभालाई निर्माता-निर्देशकले प्रस्फुटन गराउन नसकेको तर्क राख्छिन् ।

निर्माता रामकृष्ण बजगाईंले निर्माण गरेको कर्म फिल्ममा छोटो भूमिका गरेर नायिकाको रूपमा दर्ता भएकी उषा पौडेलले त्यसपछि महाकवि लक्ष्मीप्रसाद देवकोटाको मुनामदनमा बनेको मुनामदन फिल्ममा मुनाको अहं भूमिका पाइन् । भूमिका पाएपछि निकै आशाका साथ काम पनि गरिन्, तर सो फिल्म समयमा सार्वजनिक भएन । त्यसले उनको सपनामा तुषारापात भयो । यद्यपि केही अन्य फिल्ममा उनी नायिकाका रूपमा देखापरिन् । ठूलो पर्दाका फिल्ममा भन्दा केही टेलिसिरियलबाट चर्चामा आए पनि ती सिरियल बन्द भएपछि उनको चर्चा न्यून भयो । अहिले उनको हातमा कुनै फिल्म छैन । फिल्म पाए खेल्ने तीव्र इच्छा भएकी उषाले अभिनय गरेको पछिल्लो फिल्म अल्झेछ क्यारे पछ्यौरी हो । त्यसबाहेक फाट्टफुट्ट केही भिडियो फिल्म पनि छन् ।

यत्तिका फिल्म निर्माण भइरहेको वेलामा आफू फिल्मविहीन हुनुमा यी नायिकाले आ-आफ्नै तर्क दिने गरे पनि दर्शकमाझ उनीहरूको 'क्रेज' घटेकाले फिल्म पाउन छाडेको निष्कर्ष एक निर्देशकको छ । उनले नामचाहिँ नछाप्नु है भन्दै भने, 'यी हिरोइनलाई कतिपय दर्शकले चिन्दा रहेनछन् । दर्शकले नचिनेपछि हलमा जान्नन् । हलमा नगएपछि यिनीहरू खेलेको फिल्म चल्दैन । फिल्म नचलेपछि किन लिने ?'