सुजातालाई फिर्ता बोलाउन कांग्रेसमा लबिङ

काठमाडौं, ४ कात्तिक : उपप्रधानमन्त्री सुजाता कोइरालालाई सरकारबाट फिर्ता बोलाउन कार्यबाहक सभापतिसहित कांग्रेसका वरिष्ठ नेताहरूले लबिङ सुरु गरेका छन् । सुजातालाई उपप्रधानमन्त्रीमा नियुक्त गर्ने २६ असोजको प्रधानमन्त्रीको निर्णयविरुद्ध पटकपटक गोप्य बैठकमा जुटेका नेताहरूबीच सुजातालाई कसरी उपप्रधानमन्त्रीबाट फिर्ता बोलाउने भन्नेबारे छलफल भएको छ ।
बुधबार मात्रै कांग्रेस नेताहरूले दुईवटा छुट्टाछुट्टै गोप्य बैठक गरेका छन् । तिहारको सेल खान भन्दै केन्द्रीय सदस्य डा. रामशरण महतले बुधबार अपराह्न आफ्नै निवासमा बोलाएको बैठकमा सभापति गिरिजाप्रसाद कोइरालाको सिफारिसमा परराष्ट्रमन्त्री सुजातालाई उपप्रधानमन्त्री बनाइएकोमा रुष्ट एक दर्जनभन्दा बढी नेता सहभागी थिए । सुजातालाई सरकारबाट कसरी फिर्ता बोलाउन सकिन्छ भन्ने गृहकार्य गर्न छलफल सुरु भएको बैठकमा सहभागी एक नेताले स्विकारेका छन् ।
महतनिवासमा भेला भएका नेताहरूले सेल खाँदै सुजातालाई उपप्रधानमन्त्रीमा बढुवा गरेको विषयमा विमर्श गरेका थिए । कांग्रेसस्रोतका अनुसार नेताहरूले महतनिवासमा झन्डै साढे दुई घन्टा बिताएका थिए । सवा चार बजेतिर डा. रामशरणको निवास पुगेका उनीहरू साढे ६ बजेतिर बाहिरिएका थिए । कतिपय नेताहरू पार्टी केन्द्रीय कार्यालय सानेपामा महासमिति तयारी समिति बैठक सकेर सीधै महतनिवास पुगेका थिए ।
बैठकमा कार्यबाहक सभापति सुशील कोइराला, उपसभापति एवं संसदीय दलका नेता रामचन्द्र पौडेल, उपसभापति गोपालमान श्रेष्ठ, महामन्त्री विमलेन्द्र निधि, सहमहामन्त्री एवं प्रवक्ता अर्जुननरसिंह केसी, केन्द्रीय सदस्यहरू डा. रामशरण महत, बलबहादुर केसी, चिरञ्जीवी वाग्ले, पूर्णबहादुर खड्का, चक्रप्रसाद बास्तोला, डा. नारायण खड्कासहितका नेताहरू सहभागी थिए ।
'तिहार खान मलाई पनि निम्ता थियो, तर म जान भ्याइनँ, महासमितिको तयारी समिति बैठकमै व्यस्त भएँ,' केन्द्रीय सदस्य नरहरि आचार्यले नयाँ पत्रिकालाई बताए । बैठकमा सहभागी नेताहरूले प्रधानमन्त्री माधवकुमार नेपाललाई पार्टी केन्द्रीय समिति र संसदीय दलको निर्णयविपरीत सुजातालाई उपप्रधानमन्त्रीमा बढुवा गरेकोमा असन्तुष्टि जनाउँदै ध्यानाकर्षणपत्र बुझाउने सहमति गरेका छन् । पार्टी केन्द्रीय समितिको बैठकअघि नै प्रधानमन्त्रीलाई पत्र बुझाउनेमा उपस्थित सबै नेता एकमत रहेको स्रोतको दाबी छ । पार्टीको संस्थागत निर्णयविपरीत गरिने निर्णय कांग्रेसलाई मान्य नहुने भन्दै आगामी दिनमा सोहीअनुसारको निर्णय गर्नसमेत प्रधानमन्त्री नेपाललाई पत्रमार्फत सचेत गराउनुपर्ने धारणा बैठकमा नेताहरूले राखेका थिए । नेपाल नेतृत्वको सरकारलाई कांग्रेसले अहिलेसम्म निसर्त समर्थन गर्दै आए पनि अब सर्त राख्नुपर्ने धारणा प्रवक्ता केसीसहितका नेताले बैठकमा अघि सारेका थिए । प्रधानमन्त्रीलाई ध्यानकर्षणपत्र बुझाएपछि मात्र सुजातालाई फिर्ता बोलाउने विषयलाई अघि बढाउँदा सजिलो हुने नेताहरूले तर्क राखेका छन् । उनीहरूले पार्टीको आगामी बैठकमा कसरी प्रस्तुत हुने भन्ने विषयमा पनि छलफल गरेका थिए ।
यसअघि, बुधबार बिहान पनि नेताहरूको गोप्य बैठक बसेको थियो । केन्द्रीय सदस्य चक्रप्रसाद बास्तोलाको निवासमा बसेको बैठकमा पनि सुजातालाई कसरी सरकारबाट फिर्ता गराउने भन्ने विषयमा गर्मागर्मी छलफल भएको स्रोतको दाबी छ ।  मंगलबार पनि नेताहरूबीच यही विषयमा गोप्य छलफल भएको थियो । कांग्रेस नेता राधेश्याम अधिकारीको निवासमा भएको मंगलबारको बैठकमा पार्टीले सुजातालाई फिर्ता बोलाउनुपर्नेमा सहभागी अधिकांश नेता सहमत भएको स्रोतको दाबी छ ।
२८ असोजमा बसेको केन्द्रीय समिति बैठकले सभापति कोइराला र पार्टी पदाधिकारीबीचको छलफलबाट सुजाता उपप्रधानमन्त्री नियुक्ति प्रकरणलाई किनारा लगाउने निर्णय गरेको थियो । तर, सभापति कोइरालाले अस्वस्थ रहेको भन्दै पार्टी पदाधिकारीलाई भेट दिएका छैनन् । कांग्रेस केन्द्रीय समितिको बैठक ८ कात्तिकमा तोकिएको छ ।
बुधबार अपराह्नको बैठकमा सहभागी प्रवक्ता केसीले तिहारको 'खानपिन' मात्र भएको दाबी गर्दै अन्य विषयमा कुराकानी नभएको बताए । केन्द्रीय सदस्य बलबहादुर केसीले पनि प्रवक्ता केसीकै जस्तो प्रतिक्रिया दिए । उनले भने, 'रामशरणजीले सेल खान बोलाउनुभएको थियो, हामीले बाँकी सेल खाएर आयौँ ।' केन्द्रीय सदस्य डा. महतले भने भेटघाट गैरराजनीति भएको उल्लेख गर्दै भने, 'यो राजनीतिक भेटघाट होइन, तर राजनीतिक व्यक्तिहरूको जमघटमा मुलुकका सबै विषयमा कुराकानी भयो ।' पार्टीको महासमितिको बैठकको तयारी, माओवादीको गतिविधि, सरकारलाई पार्टीले दिँदै आएको समर्थन, सुजातालाई बढुवा गरेको विषयमा पनि कुराकानी भयो,' उनले भने । उनले अगाडि भने, 'सबै विषयमा कुरा भए, तर यो निर्णय नै गर्ने भेला थिएन ।'
२८ असोजमा बसेको पार्टी केन्द्रीय समितिको बैठकमा सुजाता र पार्टीका पदाधिकारी एवं केही केन्द्रीय सदस्यबीच वादविवाद नै भएको थियो । उक्त बैठकमा पार्टी पदाधिकारी र केन्द्रीय सदस्यहरूले उपप्रधानमन्त्री नियुक्ति प्रक्रिया संस्थागत नभएको भन्दै सभापति गिरिजाप्रसाद कोइरालाकै विरोध गरेपछि प्रतिवाद गर्दै केन्द्रीय सदस्यसमेत रहेकी उपप्रधानमन्त्री सुजाताले पार्टीका पदाधिकारी र केन्द्रीय सदस्यहरूलाई पटक-पटक हप्काएकी थिइन् ।
एमाले नेतृत्वको सरकारमा पार्टीको नेतृत्व गर्दै उपसभापति रामचन्द्र पौडेल सहभागी हुने अन्तिम तयारीविरुद्ध सभापति कोइरालाको एकल निर्णयबाट सुजाता पार्टीको नेतृत्व गर्दै २१ जेठमा परराष्ट्रमन्त्री नियुक्त भएकी थिइन् ।