नेपाल अर्को उपाधिनजिक

काठमाडौं/ तीन सातापछि नेपाल फेरि अर्को अन्तर्राष्ट्रिय क्रिकेटको उपाधिनजिक पुगेको छ　। एसिसी यू-१६ इलाइटकप क्रिकेट प्रतियोगिताको फाइनलमा प्रवेश गरेपछि एकै महिनामा नेपाली टोलीले दोस्रो अन्तर्राष्ट्रिय उपाधिका लागि प्रतिस्पर्धा गर्न लागेको हो　। नेपाल मंगलबार सिंगापुरविरुद्ध उपाधिका लागि भिड्नेछ　। फाइनलमा सिंगापुरलाई पाखा लगाए उमेर समूहमा सबै उपाधि जित्ने नेपाल पहिलो राष्ट्र बन्नेछ　।

तीन साताअघि सिनियर टोलीले विश्वकप क्रिकेटअन्तर्गत डिभिजन-५ को उपाधि जितेको थियो　। त्रिवि मैदानमा नेपालले आइतबार सेमिफाइनलमा मलेसियालाई ३२ रनले पराजित गर्दै अन्तिम दुईको स्थान पक्का गर्‍यो　। इन्जिनियरिङ कलेजमा सिंगापुर हङकङलाई १ सय ३३ रनको भारी अन्तरले हराउँदै फाइनल प्रवेश गरेको छ　।

घरेलु मैदानमा टस जितेर पहिलो ब्याटिङ गरेको नेपाली टोली निर्धारित ओभरभन्दा ११ बलअघि १ सय ६२ रनमा अलआउट भयो　। प्रत्युत्तरमा मलेसिया ३८ ओभर एक बलमा १ सय ३० रनमा धराशयी भयो　। उपाधिका दाबेदार मलेसियाका बलरले नेपाली टोलीलाई दबाबमा राख्यो　। विशेषगरी मलेसियाका बलरले अनुशासित भएर बलिङ गर्दा नेपाली ब्याट्सम्यान दबाबमा देखिए　। मलेसियन बलरले विकेट टु विकेट बलिङ गरेका कारण घरेलु टोलीका ब्याट्सम्यानले उत्कृष्ट स्ट्रोक खेल्न सकेनन्　। इनिङको आधा बाटो सकिँदा नेपाली ब्याट्सम्यानले एक/एक रन लिन निकै मिहिनेत गरे　। माथिल्लो तीन ब्याट्सम्यान गुमाउँदा नेपाल ५४-३ को अवस्थामा थियो　।

शीर्ष ब्याट्सम्यान शरद खड्काबाट २३ रन तथा निश्चलले १४ रनको योगदान दिए　। अघिल्लो तीन खेलका म्यान अफ द म्याच निश्चल पाण्डेको विकेट हात पार्दा मलेसियन टोलीले ठूलै राहतको महसुस गर्‍यो　। तर, दीपेन्द्र चन्दले ५८ बलमा एक चौकाको सहयोगमा ४४ रनको पारी खेलेपछि नेपालले सय रन कटायो　। दीपेन्द्रले विकेटकिपर सनम श्रेष्ठ (२४) सँग मिलेर पाँचौँ विकेटका लागि ४३ रनको साझेदारी गरेका थिए　।

'टोली स्वाभाविक रूपमा फाइनलमा पुग्दा खुसी नै मान्नुपर्छ,' नेपाली टोलीका प्रशिक्षक रोय लुक डायसले भने, 'मलेसिया पनि उपाधि दाबेदार टोली थियो　।' प्रशिक्षक डायसले नेपाली ब्याट्सम्यानले उत्कृष्ट ब्याटिङ नगरेको बताए　। 'मलेसियाविरुद्ध ब्याटिङ खासै राम्रो हुन सकेन,' उनले भने　। उनका अनुसार सिंगापुरविरुद्ध फाइनलमा नेपाली टोलीले ब्याटिङमा व्यापक सुधार गर्नुपर्छ　।

लक्ष्य पछ्याउँदा मलेसियाको इनिङ खासै राम्रो हुन भएन　। ब्याटिङमा चम्कन नसकेका निश्चलले बलिङमा भने नेपाललाई पहिलो सफलता दिलाए　। उनले प्रारम्भिक ब्याट्सम्यान राज्लानलाई ८ रनमा आउट गरे　। विवेक चौधरीले तीन विकेट लिँदा मलेसिया २६ ओभरमा ७९-५ को अवस्थामा पुग्यो　। मलेसियाको ब्याटिङमा अमदले सर्वाधिक २१ रन जोडे　।

प्रतियोगिताअन्तर्गत सातौँ र आठौँ स्थानका लागि भएको खेलमा कुवेतले थाइल्यान्डलाई ६८ रनले निराश पार्‍यो　। वीरेन्द्र सैनिक मैदानमा कुवेतले पहिलो ब्याटिङ गर्दै सात विकेट गुमाएर १ सय ५९ रनको योगफल जोड्यो　। लक्ष्य पछ्याएको थाइल्यान्ड २१ ओभर चार बलमा ९१ रनमा धराशयी भयो　।

प्रतियोगिताको तेस्रो तथा चौथो स्थानका लागि हङकङ र मलेसियाबीच सोमबार वीरेन्द्र सैनिक खेल मैदानमा खेल हुनेछ भने बहराइन र साउदीअरबबीच इन्जिनियरिङ कलेजमा पाँचौँ स्थानका लागि खेल हुनेछ　।