सेयरमा उच्च गिरावट

काठमाडौं/ कारोबार भएका चारै दिन अधिकांश सूचीकृत कम्पनीको सेयरमूल्य घटेपछि नेप्से परिसूचकमा उच्च गिरावट आएको छ ।

यो साता नेप्से परिसूचक १८ दशमलव २७ अंकले घट्दै ४ सय ८६ दशमलव २५ अंकमा रहेको छ । नेपाल टेलिकमको सेयरमूल्यमा उच्च गिरावट आएका कारण नेप्से तल झरेको हो । सेयरमूल्यमा उच्च गिरावट आएपछि नेपाल टलिकम सूचीकृत अन्य उपसमूहको उपसूचकमा उच्च ६२ दशमलव २६ अंकले तल र्झदै ५ सय २८ दशमलव ७३ अंकमा रहेको छ ।

नेप्सेका अनुसार यो साता ८६ कम्पनीहरूको १४ करोड ७३ लाख ४८ हजार रुपैयाँबराबरका तीन लाख ६६ हजार आठ सय कित्ता सेयर खरिद-बिक्री भएका छन् । कारोबार रकममा गत साताको तुलनामा ३० दशमलव ०३ प्रतिशत ह्रास आएको हो । अघिल्लो साता २१ करोड पाँच लाख ८० हजार रुपैयाँबराबरका ६ लाख १० हजार एक सय कित्ता सेयर खरिद-बिक्री भएका थिए । कुल कारोबारमध्ये 'क' वर्गका कम्पनीको मात्र सात करोड ९८ लाख रुपैयाँबराबरको कारोबार भएको छ ।

समूहगत उपसूचकमा जलविद्युत्, व्यापार तथा बिमा बढेका छन् भने वाणिज्य बैंक, वित्त तथा विकास बैंक समूहका उपसूचक घटेका छन् । कारोबार रकमका आधारमा यो साता बैंक अफ काठमान्डु अग्रस्थानमा रहको छ । बिओकेका दुई करोड ३३ लाख रुपैयाँबराबरका सेयर कारोबार भए । सेयर संख्याका आधारमा सिएमबी फाइनान्स (३१ हजार कित्ता) अग्रस्थानमा रह्यो भने कारोबार संख्या (३८७) का आधारमा भिवोर विकास बैंक अग्रस्थानमा रहेको छ ।