कोइराला मण्डिखाटार सरे

नयाँ पत्रिका

काठमाडौं, २८ फागुन

अस्वस्थ रहेका कांग्रेस सभापति गिरिजाप्रसाद कोइराला शुक्रबार छोरी सुजाताको निवास मण्डिखाटारमा सरेका छन्　।

सभापति कोइराला आफ्ना सहयोगीसहित १० बजेर पाँच मिनेटमा मण्डिखाटार पुगेका थिए　। कृष्णरक्षा राजभण्डारीको महाराजगञ्जस्थित घरमा बस्दै आएका उनी बिहान १० बजे छोरी सुजाताको निवास प्रस्थान गरेका थिए　। क्रोनिक ब्रोंकाइटिसबाट पीडित उनी स्वास्थ्यमा छिटोछिटो उतार-चढाव हुन थालेपछि आफ्नी एक मात्र सन्तान सुजाताको घरमा सरेका हुन्　।

आफैँ गाडी चढेर डेरा सरेका सभापति कोइरालाले सर्ने क्रममा आफ्नो स्वास्थ्य ठीकै रहेको संकेत गर्दै उपस्थित सञ्चारकर्मी र शुभेच्छुकलाई हात हल्लाउँदै गाडीबाट बाहिरिएका थिए　। नियमित अक्सिजन लिइरहेका कोइराला अक्सिजनमै छोरी सुजातानिवास गएका थिए　। उनको साथमा उपचारमा संंलग्न चिकित्सक डा. जगदीश अग्रवाल पनि थिए　।

सुविधासम्पन्न अस्पताल शय्यासरह सुविधामा बस्दै आएका कोइरालालाई सुजातानिवास मण्डिखाटारमा पनि त्यस्तै व्यवस्था गरिएको छ　। यसअघि सुजाता बस्दै आएको कोठामा कांग्रेस सभापति कोइरालालाई बस्ने व्यवस्था मिलाइएको छ　। कोइराला मण्डिखाटार पुग्दा घरको मूलढोकाको दायाँ र बायाँ सिँगारिएका कलश राखिएका थिए　।

यसैगरी, महाराजगञ्जबाट कोइरालाको चारवटा दराज पनि मण्डिखाटार सारिएका छन्　। उनका कपडा र ओछयान शुक्रबार बिहानै सारिएको छ　। केही सामान शनिबार सार्ने तयारी गरिएको छ　।