रेखा र विराजको फेसन मोह

फिल्ममा छिनछिनमै थरीथरीका डे्रसमा देखापर्ने अधिकांश नायक/नायिका वास्तविक जीवनमा पनि निकै फेसनेबल देखिन चाहन्छन्　। नायिका रेखा थापा आफूलाई फेसनेबल बनाउन कुनै कसर बाँकी नराख्ने बताउँछिन्　। बजारमा नयाँ फेसन आउनेबित्तिकै किनिहाल्ने बानी छ रे उनको　। भन्छिन्, 'मलाई बजारमा आएका नयाँ फेसन नकिनी हुँदैन　। मलाई हिँड्दा हिँड्दै कुनै कपडा मन पर्‍यो भने पनि किनिहाल्छु　।' उनको रोजाइमा पर्छन् छोटो स्कर्ट, लुज टाइपका वानपिस तथा जिन्स पाइन्ट र टिसर्ट　। रेखा प्रायः हप्तैपिच्छे नयाँ लुगा किन्छिन् रे　! किसिम-किसिमका कपडाले चारवटा दराज भरिएको बताउँछिन् उनी　।

'म ड्रेसमा चुजी छु　। म हम्मेसी एकपटक लगाएको कपडा फेरि दोहोर्‍याएर लगाउने गर्दिनँ,' उनी भन्छिन्, 'नयाँ कपडा एक/दुईचोटि लगाएपछि साथीहरूलाई बाँडिदिन्छु　।' कपालको स्याहारमा पनि आफूले निकै ध्यान दिने गरेको बताउँछिन् उनी　। प्रायः उनी 'हेयर स्टाइल' बदलिरहन्छिन्　। कपालको स्याहारमा महिनामा कम्तीमा पनि पाँच हजार रुपैयाँ खर्च हुने गरेको दाबी उनको छ　।

नायक विराज भट्ट आफूलाई टाइट टिसर्ट र जिन्सपाइन्ट औधी मन पर्ने बताउँछन्　। बाहिर बनेरै हिँड्ने उनको बानी पुरानै हो　। 'डे्रसको मामलामा म अलि चुजी छु,' विराज भन्छन्, 'अधिकांश समय सुटिङमै बित्ने भएकाले आफूखुसी ड्रेस लगाउने मौका कमै मिल्छ　। मौका मिल्यो भने म बजारमा चलेको लेटेस्ट फेसन खरिद गरिहाल्छु　।' विराज आफूलाई फिटिङ ड्रेस बढी मन पर्ने बताउँछन्　। जुत्तामा भने उनलाई डिंगो र स्पोर्टस् सजिलो लाग्छ रे　! उनी आफ्नो तीनवटा दराज कपडाले भरिएको बताउँछन्　। भन्छन्, 'फुर्सदको समयमा नयाँ फेसनका लुगा टन्न किनेर राख्छु　। मसँग सधैँ पाँच/सात जोर पेस ड्रेस हुने गर्छ　।' आफूलाई मन परको डे्रस जति महँगो परे पनि किन्ने गरेको सुनाउँछन् उनी　।