जन्मँदै खराब हुँदैन पुरुष

पुरुषलाई क्रूर बनाउनुमा सामाजिक परिवेश, चेतनास्तर, पारिवारिक पृष्ठभूमिजस्ता पक्ष जिम्मेवार हुन्छन्

साँच्चै सबै पुरुष खराब भएको भए हाम्रो समाज मान्छे बस्नलायक रहने थिएन । प्रत्येक पत्नीका लागि प्रत्येक श्रीमान् खराब छैनन् । कोही श्रीमान् पक्कै खराब छन् । तर, सबैलाई एउटै आँखाले हेर्नु अन्याय हुनेछ । गौतम बुद्ध पनि पुरुषै थिए । संसारको दिशा नै बदल्ने क्षमता भएका कैयौँ असल पुरुषको विवरण इतिहासमा भेटिन्छ ।

स्त्री पुरुषभन्दा शारीरिक रूपमा केही कमजोर हुन्छे, पुरुष महिलाभन्दा आँटिलो हुन्छ । यस तथ्यलाई आनीले पनि स्विकारेकी छिन् । त्यसैले पुरुषबारे खराब धारणा मात्र पालेर नबाँचौँ ।

(आनीका आँखामा पुरुष, २१ फागुन, सप्तरंग)

अशोक अधिकारी, काठमाडाँै

आनीले गरेको पुरुषबारेको विश्लेषण ठीकै लाग्यो । मानव अंग प्रत्यारोपण प्रयोगशाला खोल्ने उनको अभियानमा सफलता मिलोस् !

रेशम तामाङ, इमेलबाट

महिलाले शासन गर्ने अवसर पाए देश उँभो लाग्ने थियो भन्ने आनीको भनाइमा त्यति चित्त बुझेन । सुजाता, विद्याजस्ता महिलाका हातमा यो देश पर्‍यो भने के होला ?

दावा शेर्पा, इमेलबाट

'फूलको आँखामा फूलै संसार...' गाएर चर्चित बनेकी आनीको समाजसेवातर्फको यात्रा लोभलाग्दो छ । उनका एल्बम र आत्मसंस्मरणात्मक किताबको बिक्रीबाट आएको रकम उनी समाजसेवामा लगाइरहेकी छिन् । यो प्रशंसनीय कार्य हो । उनको यस यात्रामा बीच बाटामै पूणविराम नलागोस् ।

संगीता मोक्तान, आरुबारी, बौद्ध

पुरुषबारे आनी छोइङ डोल्माको विश्लेषण बिल्कुलै सही छ । पुरुष हातमै क्रूरता लिएर जन्मेका हुँदैनन् । पुरुषलाई क्रूर बनाउनुमा सामाजिक परिवेश, उसको शिक्षा, पारिवारिक पृष्ठभूमि, आदि जिम्मेवार हुन्छन् । विकसित देशका शिक्षित पुरुषमा समेत यस्तो रोग पाइन्छ ।

सामु पौडेल, इमेलबाट

लेख निकै प्रेरणादायी छ । अरूलाई खुसी दिनुजति ठूलो खुसी संसारमा अर्को छैन । आनीको जीवनदर्शनले सबैलाई त्यागको मार्ग देखाउनेछ । सेवा नै धर्म हो भन्ने यिनले बुझेकी छिन् ।

केशव भोजपुरे, इमेलबाट

बुझ्नेलाई त 'फूलको आँखामा फूलै संसार...' नै पर्याप्त छ । महिलालाई पुरुषले कमजोर ठान्छन् भन्दा पनि उनीहरू आफैँ आफूलाई कमजोर ठानिरहेका हुन्छन् । अधिकार माग्दै हिँड्नुभन्दा आफैँ क्षमतावान् बन्नु जरुरी छ महिलाले ।

टंक लम्साल, इमेलबाट

पुरुष खराब वा महिला खराब भनेर विश्लेषण गर्नुभन्दा पनि

त्यस्ता खराबबाट पाठ सिकेर सबैले आफूलाई असल बनाउनुपर्छ ।

विष्णु चापागाईं, अस्ट्रेलिया

आनीको सोचाइ र सामाजिक कार्यमा उनको संलग्नता दुवै

अनुकरणीय छन् ।

रामजी बलामी, जनमैत्री कलेज

पुरुष खराब हुन्छन् भन्ने आनीको सोचाइ शतप्रतिशत गलत नै त छैन । तर, सबै पुरुष खराब हुन्छन् भन्ने सोचाइ भने कसैले पनि राख्नु हुन्न । संसारमा कुनै पनि कुरा सही वा गलत छैनन् । त्यो त खालि हाम्रो सोचाइमा भर पर्ने कुरा हो ।

अमित क्षेत्री, इमेलबाट

पुरुषलाई खराब देख्ने आनीको नजरले पुरुषलाई बर्बाद पार्ने महिलालाई पनि त देखेको होला । उनीहरूबारे पनि केही बोलिदिएको भए के जान्थ्यो र ?

गिर रोदन, इमेलबाट

गायिका अनि समाजसेवी आनीका विचारमा सहमत छु । नेपालमा उनीजस्तै छोरीहरूले जन्म लिनु आवश्यक छ । यस्तै उच्च विचार बोकेका उदार मनका धनीले समाजलाई अघि बढाउन सक्छन् ।

महेश पौडेल, इमेलबाट