पहिलोपल्ट क्यामेरा फेस गर्दा...

पहिलोपल्ट क्यामेरा फेस गर्दाको क्षण सम्भिmँदा मलाई अहिले पनि मीठो अनुभूति हुन्छ । मेरो पहिलो फिल्म अग्निपथ थियो । यो ०६० सालतिरको कुरा होला । आफ्नो सपनाको क्षेत्रमा पहिलो पाइला चालेको दिन के-कस्तो होला भन्ने चिन्ता लाग्नु त स्वाभाविकै हो । तर, मलाई डर भने लागेको थिएन । उत्साह, कौतुहल र खुसी मिसिएको त्यस क्षणलाई म अहिले बयान गर्नै सक्दिनँ । अभिनय-यात्रा सुरु भएको त्यो क्षण मेरो जीवनको सबैभन्दा सुखद क्षण थियो ।

विराज भट्ट, नायक

यो कस्तो मायाको सुटिङमा म पहिलोपल्ट क्यामेराअगाडि उभिएकी थिएँ । म फिल्म लाइनमा विनायोजना आएकी थिएँ । क्यामेरा अगाडि उभिँदा ज्यादै डर लागेको थियो । उत्साहित पनि थिएँ । मलाई त्यस वेला नडराउन र अप्ठ्यारो नमान्न सिनियर दाइहरूले धेरै हौसला दिनुभयो । तर, दुःखको कुरा मेरो पहिलो फिल्म विविध कारणले रिलिज हुन सकेन । र, मेरा दर्शकले मैले पहिलोपल्ट क्यामेराअगाडि उभिएको दृश्य हेर्न पाउनुभएन ।

नन्दिता केसी, नायिका

मेरो पहिलो फिल्म पिँजडा हो । मार्सलआर्टमा काम गर्दा पनि धेरैपल्ट क्यामेरा फेस गरेको हुनाले मलाई अलिकति पनि डर लागेन ।

अभिनय गर्न सक्छु भन्ने पूर्ण आत्मविश्वासका साथ सुटिङस्थलमा पुगेको थिएँ । फिल्म-यात्राको सुरुवात भएकाले म ज्यादै उत्साही थिएँ । त्यो क्षण मेरो जिन्दगीको सबैभन्दा अविस्मरणीय र सुखद क्षण हो ।

निखिल उप्रेती, नायक

आठ वर्षअघि टेलिशृखला वसन्तीको अभिनय गर्दा मैले पहिलोपल्ट क्यामेरा फेस गरेको थिएँ । म मोडलिङबाट फिल्म लाइनमा आएकी हुँ । अभिनयको पहिलो दिन मभित्र उत्साह र खुसी भरिएको थियो । पहिलो सटमा मैले रानी भएर ढोकाबाट निस्किएर सिंहासनमा गएर बस्नुपर्ने थियो । मोडलिङ क्षेत्रबाट आएकी हुनाले मेरो हिँडाइ क्याटवाक गरेजस्तो भएछ र फेरि रिसुट गर्नुपरेको थियो । त्यो क्षण म कहिल्यै बिर्सिन्नँ ।

ऋचा घिमिरे, नायिका