कोइराला सक्रिय

नयाँ पत्रिका

काठमाडौं, ६ माघ

उच्चस्तरीय संयन्त्र गठनपछि कांग्रेस सभापति गिरिजाप्रसाद कोइरालाको राजनीतिक सक्रियता बढेको छ　। चिकित्सकको सल्लाहविपरीत कोइराला राजनीतिक भेटघाट र उठबसमा सक्रिय हुन थालेका हुन्　।

सरकार सञ्चालन र संविधान निर्माणमा सघाउन उच्चस्तरीय राजनीतिक संयन्त्र गठनको प्रस्ताव गर्दै आएका कांग्रेस सभापति कोइरालाकै संयोजकत्वमा २४ पुसमा उच्चस्तरीय संयन्त्र गठन भएको थियो　।

क्रोनिक ब्रोङ्काइटिस रोगबाट पीडित कोइरालालाई चिकित्सकले भने स्वास्थ्य र उमेरका कारण 'सक्रिय नहुन' सल्लाह दिएका छन्　। तर, त्यसविपरीत उनी राजनीतिक तथा कूटनीतिक भेटघाटमा व्यस्त हुन थालेका छन्　। शान्तिप्रक्रिया र संविधान निर्माणप्रति चिन्तित रहेकाले उनको सक्रियता बढेको कोइरालाका विदेश मामिला सल्लाहकार डा. सुरेश चालिसेले बताए　। 'उच्चस्तरीय संयन्त्र गठनपछि उहाँ निकै व्यस्त हुनुभएको छ,' चालिसेले नयाँ पत्रिकासँग भने　। पछिल्ला दिनमा कोइराला सार्वजनिक समारोहमा भने देखिएका छैनन्　। नियमित औषधि सेवन गरिरहेका उनलाई चिकित्सकले पूर्ण रूपमा बेडरेस्टमा रहन सल्लाह दिएका छन्　।

उपचारका क्रममा दुई साता लामो सिंगापुर बसाइ सकेर ७ मंसिरमा काठमाडौं र्फकेका कोइरालाले पुसको अन्तिम साताबाट राजनीतिक भेटघाट तीव्र पारेका हुन्　। कोइरालाले यसबीचमा प्रधानमन्त्री, प्रमुख प्रतिपक्षी एकीकृत माओवादीका अध्यक्ष प्रचण्ड, एमाले अध्यक्ष झलनाथ खनाल र केही विदेशी कूटनीतिज्ञका साथै विशिष्ट अवस्थामा मात्र पार्टीका केही पदाधिकारीलाई भेट्ने गरेका थिए　। कांग्रेस केन्द्रीय सदस्य कृष्णप्रसाद सिटौलासँग मात्र उनी नियमित कुराकानी गर्थे　।

पछिल्लो एक सातामा कोइरालाले कूटनीतिक नियोगका प्रमुखहरू र उनलाई भेट्न निवास आएका पार्टीका नेताहरूसँग पनि भेटघाट गरेका छन्　।

कोइरालाले २७ पुसमा नेपालका लागि नर्वेका राजदूत तथा पूर्वराजदूतसँग भेटवार्ता गरेका थिए　। कोइरालासँगको भेटमा राजदूतले उच्चस्तरीय राजनीतिक संयन्त्र गठन भएकोमा खुसी साटेका थिए　। २८ पुसमा जिल्ला भ्रमणबाट र्फकेका पार्टीका कार्यवाहक सभापति सुशील कोइरालाले सभापतिसँग भेटघाट गरेका थिए　। सुशीलसँग कोइरालाले जिल्लाको राजनीतिक अवस्था र उच्चस्तरीय संयन्त्रको विषयमा कुराकानी गरेका थिए　।

त्यसैगरी कोइरालाले २९ पुसमा एमाले अध्यक्ष खनालसँग आफ्नै निवासमा झन्डै २५ मिनेट लामो भेट गरेका थिए　। उच्चस्तरीय संयन्त्रका विषयमा अन्य दल र पार्टीभित्रैबाट विरोध भएपछि दुई नेताबीच प्रधानमन्त्रीसहित अन्य दलका नेतालाई संयन्त्रमा राख्नेबारे छलफल भएको थियो　। ३० पुसमा उनले सोही विषयमा एकीकृत माओवादी अध्यक्ष प्रचण्डसँग छलफल गरेका थिए　। बिहान ८ बजेपछि प्रचण्ड र कोइरालाबीच ४५ मिनेट लामो कुराकानी भएको थियो　। सोही दिन उनले नेपालका लागि बंगलादेशका राजदूत, पार्टीका वरिष्ठ नेता शेरबहादुर देउवा, केही पूर्वसचिव, स्वास्थ्यमन्त्री र बिएल शर्मासँग भेटेका थिए　।

त्यस्तै, कोइरालाले १ माघमा राष्ट्रिय प्रजातन्त्र पार्टीका अध्यक्षसँग पछिल्लो राजनीतिक अवस्था र उच्चस्तरीय राजनीतिक संयन्त्र गठनबारे छलफल गरेका थिए　। राप्रपा अध्यक्षले संयन्त्रका संयोजक रहेका कोइरालालाई साना राजनीतिक दललाई पनि संयन्त्रमा सहभागी गराउन माग गरेका थिए　।

सोही दिन युरोपेली संघका सदस्यराष्ट्र फिनल्यान्ड, डेनमार्क, प|mान्स, जर्मनी र बेलायतका राजदूतहरूले कोइरालाको भेट पाएका थिए　। उनीहरूले उच्चस्तरीय राजनीतिक संयन्त्रलाई स्वागत गर्दै कोइरालालाई शान्तिप्रक्रियालाई निष्कर्ष दिन आग्रह गरेको सुरेश चालिसेले जानकारी दिए　। राजदूतहरूसँग कोइरालाले संयुक्त राष्ट्रसंघका महासचिवले नेपालको शान्तिप्रक्रियाबारे गरेको टिप्पणीको आलोचना गरेका थिए　।

सभापति कोइरालाले २ माघमा पार्टीका नेता तथा कार्यकर्तालाई भेट दिए　। सोही दिन उनीसँग भारतीय विदेशमन्त्रीको टोलीले भेट गरेको थियो　। त्यसक्रममा कोइरालाले शान्तिप्रक्रियालाई निष्कर्ष दिन भारत सरकारको थप सहयोगको अपेक्षा व्यक्त गरेका थिए　। ४ माघमा कोइरालाले पार्टीका वरिष्ठ नेता देउवा, पार्टीका तर्फबाट सरकारमा सहभागी केही मन्त्रीका साथै पार्टीका अन्य नेता तथा कार्यकर्तासँग भेटघाट गरेका थिए　। कोइरालाले हालै सम्पन्न नेपाल बारका नवनिर्वाचित कार्यसमितिका सदस्यसँग समेत सोही दिन भेटघाट गरे　।

५ माघमा उनकै निवासमा उच्चस्तरीय राजनीतिक संयन्त्रको पहिलो बैठक बसेको थियो　। सो बैठकमा संयन्त्रका सदस्यका साथै प्रधानमन्त्री र विभिन्न नेता सहभागी थिए　। कोइरालाले शान्ति, स्थायित्व र संविधान निर्माणलाई संयन्त्रले मूल एजेन्डा बनाएर काम गर्नुपर्ने भन्दै माओवादीलाई आन्दोलनका सबै कार्यक्रम फिर्ता लिन आग्रह गरेका थिए　। उनले शान्तिप्रक्रियालाई निष्कर्ष दिन, समयमा संविधान निर्माण र जनआन्दोलनबाट प्राप्त उपलब्धिको रक्षा गर्दै त्यसलाई स्थायित्व दिन सबैको सहयोगका लागि आह्वानसमेत गरेका थिए　।

कोइरालाले समय अत्यन्त कम रहेको भन्दै प्रमुख तीन एजेन्डाबाट विषयान्तर भए लक्ष्यमा पुग्न नसकिने दाबी गरेका थिए　।

नेता कोइरालाले ६ माघमा दक्षिण तथा मध्यएसियाली मामिला अमेरिकी प्रमुख उपसहायक विदेशमन्त्री पेटि्रक मुनसँग भेट गरेका छन्　। भेटमा उनले सेना समायोजन प्रक्रियालाई प्रमुख प्राथमिकतामा राखेर काम गर्ने आश्वासन दिएको चालिसेले बताए　।