Naya Patrika: सिंगापुर जानुअघि नै गिरिजाबाबुलाई क्यान्सरको शंका थियो : सुजाता

सिंगापुर जानुअघि नै
गिरिजाबाबुलाई क्यान्सरको
शंका थियो : सुजाता
================================================================================
Naya Patrika on 30/11/2009 07:35:00
 
नयाँ पत्रिका
काठमाडौं, १४ मंसिर
उपप्रधानमन्त्री तथा कांग्रेस
केन्द्रीय सदस्य सुजाता
कोइरालाले पनि पार्टी सभापति
गिरिजाप्रसाद कोइरालालाई
क्यान्सरको शंका रहेको बताएकी
छिन् । उपचारका लागि सिंगापुर
जानुअघि सभापति कोइरालालाई
क्यान्सरको शंका आफूहरूले
गरेको बताइन् । तर, उनले सभापति
कोइरालालाई क्यान्सर भएको हो
वा होइन भन्ने केही खुलाएकी
छैनन् ।
कोइरालाको छोरीसमेत रहेकी
सुजातासँग सञ्चारकर्मीहरूले
कांग्रेस सभापति कोइरालाई
क्यान्सर भएको हो ? भनेर प्रश्न
गरेका थिए । उनले भनिन्,
'डाइनोसिस गर्न जानुभन्दा अघि
हामीलाई क्यान्सरको शंका भएको
थियो ।' सुजाताले थप केही
भन्नुअघि आयोजक रिपोर्टर्स
क्लबका अध्यक्ष ऋषि धमला भने,
'दिदी यो त वाहियात कुरा हो, होइन
दिदी ?' धमलाको यो टिप्पणीपछि
सुजाता पत्रकार सम्मेलनबाट
उठेर हिँडिन् ।
त्यसअघि सुजाताले पार्टी
उपसभापति रामचन्द्र
पौडेलसहितका केही वरिष्ठ नेता
शान्तिप्रक्रिया भाँड्न
लागिपरेको आरोप लगाएकी छिन् ।
आइतबार होटल माउन्टेनमा
आयोजित कार्यक्रममा सुजाताले
केही दिनअघि पार्टी सभापति
गिरिजाप्रसाद कोइरालासँगको
भेटमा ती नेताले उच्चस्तरीय
राजनीतिक संयन्त्रको विरोध
गर्दै संयन्त्र बन्नै नदिने
बताएको जानकारी दिइन् ।
संयन्त्र गठनका लागि छलफल गर्न
कोइरालानिवास बेलाइएको भेटमा
संसदीय दलका नेतासमेत रहेका
पौडेल, उपसभापति प्रकाशमान
सिंह, केन्द्रीय सदस्य डा.
रामशरण महतलगायत नेताहरूले
संयन्त्रको विरोध गरेको
बताइन् । 'उहाँहरू संयन्त्र
बन्दैन, बन्न दिँदैनौ, द्वन्द्व
भए होस् भनेर हिँड्नुभयो,' उनले
भनिन्, पदमा बसेर यस्तो कुरा
गर्ने ? शान्तिप्रक्रिया
बिथोलेर मुलुकलाई कहाँ
पुर्‍याउन लागिरहनुभएको छ
उहाँहरू ।' मुलुक ठूलो
द्वन्द्वमा फस्न लागेको भन्दै
उच्चस्तरीय संयन्त्र नबने
शान्तिप्रक्रिया अवरुद्ध हुने
भन्दै सभापति कोइरालाले
चिन्ता व्यक्त गरेको उनले
बताइन् ।
सुजाताले पार्टीभित्रको
विरोधको बाबजुत पनि
उच्चस्तरीय राजनीतिक संयन्त्र
छिट्टै गठन हुने बताइन् ।
'उच्चस्तरीय राजनीतिक
संयन्त्रले शान्तिप्रक्रिया,
नयाँ संविधान र मुलुकका
विद्यमान समस्याको समाधान
गर्ने छ,' उनले भनिन् । कांग्रेस
सभापति कोइरालालाई
राष्ट्रपतिको लोभ नभएको
बताउँदै सुजाताले भनिन्, 'उहाँ
-गिरिजाप्रसाद) ले डा. रामवरण
यादवलाई राष्ट्रपति
बनाउनुभएको हो, उहाँलाई हटाएर
आफू किन बन्नुपर्‍यो ।'
एकीकृत माओवादीलाई साथमा नलिई
शान्तिप्रक्रिया निष्कर्षमा
नपुग्ने दाबी गर्दै सुजाताले
भनिन्, 'संविधान निर्माण र
शान्तिप्रक्रियालाई
निष्कर्षमा पुर्‍याउन
माओवादीलाई साथ लिनै पर्दछ ।
'उहाँहरू उच्चस्तरीय राजनीतिक
संयन्त्रमा बस्नुभयो भने
मुलुकलाई राम्रो हुन्छ,'
सुजाताले भनिन् ।'