बलि रोक्न तपस्वीको आह्वान

बारा, २१ असोज  : तपस्वी रामबहादुर बम्जनले बाराको गढीमाइर्ं मेलामा चढाइने बलि रोक्ने चेतावनी दिएका छन्. । बाराको हलखोरियास्थित जंगलमा तपस्यारत बम्जन मंगलबार तपस्यास्थलमा सञ्चारकर्मीमाझ प्रस्तुत भएका थिए ।

प्रत्येक पाँच वर्षमा मंसिरको पहिलो सातादेखि लाग्ने गढीमाईं मेलामा आफ्ना मनोकांक्षा पूरा हुन्छ भन्ने जनविश्वासका साथ भारत, भुटान र नेपालका विभिन्न स्थानबाट लाखौँको संख्यामा भक्तजनहरू बलि चढाउन यहाँ आउने गर्छन् ।

तपस्वी बम्जनले निर्दोष प्राणीको बलि दिएर कुनै पनि भगवान्को पूजा नहुने उल्लेख गर्दै सहमतिबाट बलि नरोकिए आफू स्वयं गढीमाईंमा गई रोक्ने दाबी गरे ।

यता सदियांँदेखि चलिआएको बलिप्रथा कसैले रोक्न नसक्ने गढीमाइर्ंका मूलपुजारी मंगल चौधरीको भनाइ छ । 'बलिकै कारण गढीमाइर्ं मेला विश्वप्रसिद्ध हुन पुगेको छ, यो नेपालकै गौरव हो,' उनको दाबी छ ।

बलि रोक्न तपस्वीले आफूलाई समेत आग्रह गरेको चौधरीले जानकारी दिए । मन्दिरमा बलि नचढाउने विषयमा तपस्वीले प्रमुख जिल्ला अधिकारी, प्रहरी उपरीक्षक, सशस्त्र प्रहरीका उच्च अधिकृत, सभासद्, मेलासमितिका सदस्यलाई तपस्यास्थलमै केही दिनअघि आग्रह गरेका थिए ।

'बलिले पुण्य हुँदैन, यसलाई रोक्नुपर्छ,' तपस्यास्थल पुगेका प्रमुख जिल्ला अधिकारी तारानाथ गौतमसँग कुरा गर्दै तपस्वीले भने, 'बलिको परिणाम अत्यन्त नराम्रो हुनेछ ।'

मंसिर शुक्लपक्ष सप्तमी तिथिदेखि सुरु हुने मेलामा चार दिनसम्म आफू पनि उपस्थित हुने बताउँदै तपस्वी बम्जनले तपस्यास्थल पुगेका व्यक्तित्वलाई बलि नियन्त्रणका लागि पहल गर्न सुझाब दिएको प्रजिअ गौतमले जानकारी दिए ।

'आमाले आफ्नो सन्तानको बलि चाहँदैनन्,' तपस्वीले भने, 'यसको अन्त्य हुनु जरुरी छ ।' प्रजिअ गौतमले बलि रोक्ने र खुला गर्ने अधिकार प्रशासनलाई नभएको बताए । 'यसको निर्णय समाजले नै गर्नेछ,' उनले भने ।

यता, बारा क्षेत्र नं. २ का सभासद् तथा स्थानीय शिवचन्द्र कुशवाहाले गढीमाई मेलामा बलि रोक्न नसकिने बताए । मेला सञ्चालन तथा व्यवस्थित गर्न सक्रियसमेत रहेका कुशवाहाले करोडांँ जनताको आस्था रहेको गढीमाईं मन्दिरको बलिप्रथा रोक्न आफूहरूबाट सम्भव नहुने उल्लेख गरे ।

सेतो मुसा, बोका, कुखुरा, सुंगुर र राँगाको पञ्चबलि चढाई सुरु हुने उक्त मेलामा एक लाखभन्दा बढी बलि चढ्ने गरेको मेला समितिले जनाएको छ ।