करोडौँ ठगीमा एभ्को इन्टरनेसनलकी सञ्चालक पक्राउ

काठमाडौं, ११ माघ

गाडीको कारोबारको क्रममा करोडौँ ठगी गरेको आरोपमा प्रहरीले एभ्को इन्टरनेसनलकी सञ्चालक विनिता प्रधानलाई पक्राउ गरेको छ । भारतमा समेत करोडौँ ठगी गरेको आरोपमा उनीमाथि रेडकर्नर नोटिस जारी गरिएको थियो ।

भारतीय प्रहरीको प्रस्तावमा विनितालाई पक्राउ गर्न तीन साताअघि मात्र इन्टरपोलमा रेडकर्नर नोटिस जारी भएको थियो । इन्टरपोलकै सूचनाको आधारमा थाइल्यान्डबाट बुधबार काठमाडौं आउँदै गर्दा उनलाई नेपाल प्रहरीको केन्द्रीय अनुसन्धान ब्युरो -सिआइबी) ले त्रिभुवन अन्तर्राष्ट्रिय विमानस्थलबाट पक्राउ गरेको हो । प्रहरीले उनको ४०४५७१२ नम्बरको राहदानीसमेत बरामद गरेको छ ।

इन्टरपोलको सूचनाको आधारमा थाइल्यान्डको प्रहरीले विनितालाई नेपाल 'डिपोर्ट' गरिदिई त्यसको जानकारी नेपाल प्रहरीलाई दिएको थियो । भारतमा उनले झन्डै २५ करोड भारुबराबरको ठगी गरेको प्रहरीले जनाएको छ । नेपालमा पनि विभिन्न सर्वसाधारणलाई करिब आठ करोड ठगी गरेको प्रहरीले जनाएको छ ।

महानगरीय प्रहरी परिसर काठमाडौंले विनिताविरुद्ध तीन महिनाअघि नै ठगी मुद्दा अदालतमा दर्ता गरिसकेको छ । काठमाडौं परिसरका इन्सपेक्टर कृष्ण पंगेनीका अनुसार प्रधानदम्पतीले कार बिक्री गरी नामसारी नगरी दर्जनौँ व्यक्तिलाई ठगी गरेका थिए । उनीहरू नेपाल र भारतमा हुन्डाई गाडीको कारोबारमा संलग्न थिए ।

भारतमा भने उनीहरूले सहिता सर्भिसेस प्रालिका नाममा हुन्डाईकै डिलर खोलेका थिए । सिआइबीका इन्सपेक्टर अनुपमशमशेर राणाका अनुसार सो कम्पनीको कारोबारको क्रममा उनीहरूले एसबिआई बैंक भारतलगायतलाई करिब २५ करोड भारतीय तिर्नुपर्ने थियो । गाडीको कारोबारका लागि भनेर लिइएको रकम अन्यत्र दुरुपयोग गरेको र गाडी बिक्रीबाट आउने रकम सहमतिविपरीत अन्यत्र जम्मा गरी उनीहरू ठगी गरी फरार भएका थिए ।

इन्टरपोलले ५ जनवरीमा मात्र विनिताको नाममा रेडकर्नर नोटिस जारी गरेको थियो । व्यवसाय सञ्चालनका लागि बैंकसँग लिइएको 'क्यास क्रेडिट लिमिट' सेवाअन्तर्गत ठगी गरेर उनी फरार भएकी थिइन् । सो ठगी घटनामा विनिताका श्रीमान् सञ्जय तथा अन्य सहयोगीहरू धीरेन तामाङ, अनुप क्षेत्री र माधवी श्रेष्ठसमेत हाल फरार छन् ।

भारतीय प्रहरीको मोस्ट वान्टेड सूचीमा भए पनि सुपुर्दगी सन्धि नभएकाले विनितालाई भारतीय प्रहरीसमक्ष नबुझाइने प्रहरीले जनाएको छ । प्रहरीले उनलाई बिहीबार सीधै अदालतमा पेस गर्ने भएको छ ।

प्रहरीका प्रारम्भिक अनुसन्धानमा ठगी गरेको रकमबाट विनिता थाइल्यान्डमा बस्दै आएकी थिइन् । नेपालमा गाडीको कारोबारमा एभ्को चर्चित कम्पनी थियो । तर, ठगी गरेको आरोपमा मुद्दा परेपछि कम्पनी बन्द गरी उनीहरू फरार भएका थिए ।