भ्रष्टाचारविरुद्ध जुम्लीहरू दियालो लिएर अख्तियारमा

काठमाडौं, ११ माघ

जिल्लामा भ्रष्टाचार व्याप्त भएको भन्दै जुम्लाका जनता हात-हातमा दियालो बोकेर राजधानी आएका छन् । पाँच दिन लगाएर जुम्लाबाट राजधानी आएका जुम्लीहरूले गाउँमा भ्रष्टाचार बढेकाले आफूहरूले दुःख पाएको दुखेसो गरे ।

भ्रष्टाचारको सीमा नाघेकाले गाउँमा पूरै विकास अवरुद्ध भएको उनीहरूको भनाइ थियो । जुम्लाबाट तीन दिन पैदल हिँडेर मान्मा आइपुगेका उनीहरू त्यसपछि सुर्खेत हुँदै दुई दिन लगाएर गत सोमबार राजधानी आएका थिए । जुम्लाबाटै हातमा दियालो लिएर आएका झन्डै ४० जना जुम्लीहरू बुधबार अख्तियार दुरुपयोग अनुसन्धान आयोगमा गएर भ्रष्टचारविरुद्ध आवाज उठाए ।

हातमा दियालो बोकेर एक हुल गाउँले अख्तियार पुग्दा सुरुमा त अख्तियारका अधिकारीहरू आश्चर्यमा परेका थिए । दियालो समाएरै उनीहरूले आयोगमा भ्रष्टाचारीविरुद्ध उजुरी दर्ता गराए । त्यसपछि उनीहरूले सचिव भगवतीकुमार काफ्लेलाई भेटेर भ्रष्टाचारीको नालीबेली सुनाउन पाउनुपर्ने माग गरे ।

सचिव काफ्ले पनि उनीहरूसँग छलफलमा बस्न तयार भए ।

जुम्लीहरूले अख्तियारका सचिव काफ्लेसहितका उच्च अधिकारीहरूसित अख्तियारकै सभाकक्षमा एक घन्टा छलफल गर्दै भ्रष्टाचारीलाई कडा कारबाही गर्न माग गरे । छलफल अवधिभर पनि सबै जुम्लीहरूका हातमा दियालो थियो । 'हामी जिल्लामा भ्रष्टाचारविरुद्ध लड्दालड्दै हैरान भएर यहाँ आएका हौँ, अब तपाईंले केही गरिदिनुपर्‍यो,' सोझा जुम्लीहरूले एक मुखले सचिव काफ्लेसँग आग्रह गरे । उनीहरूले भ्रष्टाचारीहरू नै गाउँघरमा शक्तिशाली भएको भन्दै आक्रोश पोखे ।

जुम्लाको शनिगाउँ गाविस-६ काँडागाउँमा पर्ने कालापाल्त सिँचाइ कुलो मर्मतका लागि आएको पाँच लाख रुपैयाँ सबै झ्वाम पार्ने काम गरिएको भन्दै जुम्लीहरूले उपभोक्ता समितिका अध्यक्ष र इन्जिनियरहरूमाथि कारबाहीको माग गर्दै अख्तियारमा उजुरी दर्ता गराएका छन् । कारबाहीको माग गरिएकामा उपभोक्ता समितिका अध्यक्ष मल्ल बुढा र इन्जिनियरहरू रामभक्त शर्मा र रामभरत मण्डल छन् । उजुरी बुझाएलगत्तै अख्तियारले बुधबार नै इन्जिनियहरू शर्मा र मण्डल तथा अध्यक्ष बुढालाई बयानका लागि आयोगमा बोलाउने निर्णय गरेको छ ।

अख्तियार सचिव काफ्लेले कुलो मर्मतका क्रममा भएको पाँच लाख अनियमितताको बारेमा बुधबारदेखि नै छानबिन थालिएको र इन्जिनियर तथा उपभोक्ता समितिका अध्यक्षलाई बयानका लागि बोलाउने निर्णय गरिएको जानकारी दिए । 'जुम्लाजस्तो विकट ठाउँमा रहेका बासिन्दाहरू यसरी आयोगमा आएर भ्रष्टाचारीलाई कारबाहीको माग गर्नु निकै सकारात्मक हो, त्यसैले हामीले पनि यो केसलाई गम्भीरतापूर्वक अगाडि बढाएका छौँ,' आयोग सचिव काफ्लेले नयाँ पत्रिकासँग भने ।

जुम्लीहरूले जिल्लामा अख्तियारद्वारा खटाइएका उपआयुक्तहरूले भ्रष्टाचारीमाथि कुनै कारबाही गर्न नसकेको भन्दै सचिवको ध्यानाकृष्ट गराएका थिए । उनीहरूले जिल्लामा सात महिनाअघि नै कुलोमा भएको अनियमितताको छानबिन गर्न माग गर्दै जिल्ला प्रशासन कार्यालयमा उजुरी गरेको भए पनि प्रमुख जिल्ला अधिकारीले कुनै चासो नलिएको बताए । अख्तियारका उपआयुक्त कृष्णमोहन कोइरालालाई पटकपटक भेटी यस विषयमा जानकारी लिन खोज्दा कोइरालाले पनि एक-दुई महिना लाग्छ भन्दै टार्दै आइरहेको जुम्लीहरूले सुनाए ।

आफूहरूले जुम्लाबाट स्वतःस्फुर्त रूपमा भ्रष्टाचारविरुद्ध अभियान थालेको उनीहरूले बताए । 'हामी अति भएर आएका हौँ,' राजधानी आएका जुम्ली समूहको नेतृत्व गरेका स्थानीय वाचे बुढाले भने । उनीहरू आफ्नै खर्च र जोहोमा राजधानी आएका हुन् । आफैँले उत्पादन गरेको आलु, मकै, फापर बेचेर खर्चको जोहो गरी राजधानी आएको उनीहरूले बताए । '६ महिनासम्म अभावैअभावमा बाँच्न विवश छौँ, त्यस्तो ठाउँमा विकास गर्न गएको पैसा पापीहरूले खाइदिन्छन्,' ७८ वषर्ीय लक्षीराम बुढाले भने ।

प्रधानमन्त्रीलाई भेट्ने चाहना

जुम्लीहरूले प्रधानमन्त्री डा. बाबुराम भट्टराईलाई पनि भेट्ने इच्छा व्यक्त गरेका छन् । तर, कैयौँ प्रयास गर्दा पनि प्रधानमन्त्रीलाई भेट्ने अवसर उनीहरूले पाउन सकेका छैनन् ।

प्रधानमन्त्रीलाई भेट्ने सम्पर्क सूत्र नहुँदा निकै कठिन भएको उनीहरूले बताए । सिंहदरबारमा गएर भेट्ने प्रयास गरे पनि सिंहदरबारभित्र प्रवेश गर्ने पास कतैबाट पाउन सकेका छैनन् । खर्च-सामल सिद्धिएकाले अब धेरै दिन काठमाडौं बस्न नसक्ने अवस्था उनीहरूको छ । 'आफैँ-आफैँ थोरै खर्चको जोहो गरेर आएका हौँ, अब खर्च सकिएकाले समस्या परेको छ,' वाचे बुढाले भने ।