एसएलसी प्रश्नपत्र छाप्न तीन तहको सुरक्षा घेरा

काठमाडौं, ११ माघ

०६८ को एसएलसी परीक्षाको प्रश्नपत्र छाप्न तीन तहको सुरक्षा घेरा तयार पारिएको छ । सानोठिमिस्थित जनक शिक्षा सामग्री केन्द्र लिमिटेडको 'सेक्युरिटी प्रेस'मा प्रश्नपत्र छाप्नका लागि नेपाली सेना, सशस्त्र प्रहरी र नेपाल प्रहरी गरी तीन तहको सुरक्षा घेरा बनाइएको हो ।

परीक्षा नियन्त्रण कार्यालय र जनक शिक्षाका कर्मचारीले बिहीबारदेखि सो सुरक्षा घेराभित्र बसेर काम गर्ने तयारी गरेका छन् । सरकारको निर्णयअनुसार अघिल्लो वर्षदेखि एसएलसीको प्रश्नपत्र नेपालमै छाप्न सुरु गरिएको थियो । अघिल्लो वर्ष पनि जनक शिक्षाको सेक्युरिटी प्रेसमा प्रश्नपत्र छपाइ गरिएको थियो । जनक शिक्षा सामग्री केन्द्रका प्रबन्ध सञ्चालक रामचन्द्र सिलवालले प्रश्नपत्र छपाइका लागि अघिल्लो वर्षभन्दा पनि व्यवस्थित रूपमा काम भइरहेको बताए ।

प्रश्नपत्र छाप्ने ठाउँमा सबैभन्दा भित्र नेपाली सेना, त्यसपछि सशस्त्र प्रहरी र बाहिरी तहमा नेपाल प्रहरीलाई खटाइएको छ । सुरक्षाका लागि २५ जना नेपाली सेना, ३० जना सशस्त्र प्रहरी र १५ जना नेपाल प्रहरीलाई खटिएका छन् । केही दिनअघि शिक्षामन्त्रीसहित सुरक्षासम्बन्धी बैठक बसी सुरक्षाको प्रबन्ध मिलाइएको थियो । प्रश्नपत्र छपाइ कार्य २६/२७ दिनमा सक्ने लक्ष्य राखिएको छ । सो अविधिभर कर्मचारी तथा सुरक्षाकर्मी भित्रै रहनेछन् । सुरक्षाकर्मीले खानाको प्रबन्ध आफैँ गर्नेछन् भने पनिका र जनक शिक्षाका कर्मचारीलाई जनक शिक्षाले नै खाना खुवाउनेछ ।

यस वर्षको एसएलसी परीक्षामा पाँच लाख ६० हजार परीक्षार्थी सहभागी हुने अपेक्षा गरिएको छ । ६ विषय अनिवार्यसहित ५८ विषयको प्रश्नपत्र निर्माण गर्नुपर्नेछ । क्षेत्रगत रूपमा समेत भिन्न हुनेछन् प्रश्नपत्र ।

प्रश्नपत्रलगायत सरकारी गोप्य सामग्री छाप्ने उद्देश्यले नेपालमा १४ करोडको 'सेक्युरिटी प्रेस' भित्र्याए पनि शिक्षाका हाकिमहरू भने एसएलसीको प्रश्नपत्र छाप्न भारत जाने गरेका थिए । संसद्को लेखा समिति, सरकार तथा अख्तियार दुरुपयोग अनुसन्धान आयोगले समेत प्रश्नपत्र नेपालमै छाप्ने व्यवस्था गर्न निर्देशन दिएपछि शिक्षा मन्त्रालय, परीक्षा नियन्त्रण कार्यालयले अघिल्लो वर्षदेखि नेपालमै छाप्न सुरु गरेका हुन् ।