शान्ति र संविधानका लागि एकढिक्का ः प्रचण्ड

पाल्पा, १० माघ
माओवादी अध्यक्ष पुष्पकमल दाहाल प्रचण्डले शान्ति र संविधानका लागि पार्टी एकढिक्का भएर अगाडि बढ्ने बताएका छन् । उनले एकताबद्ध भएर जनयुद्धका उपलब्धिलाई रक्षा गरी पार्टीको जनलहर ल्याउन कार्यकर्तालाई निर्देशन दिए ।
'जनयुद्धको उपलब्धि रक्षा गर्न माओवादीकै नेतृत्वमा शान्ति र संविधानलाई टुंगोमा पुर्‍याउने काम भएकाले हामी नेताहरू पनि एक भएर आएका छाँै,' पाल्पामा मंगलबार आयोजित माओवादीको मगरात र तमुवान राज्य समितिको केन्द्रीय राजनीतिक तथा विचारधारात्मक प्रशिक्षण कार्यक्रममा प्रचण्डले भने, 'तपाईंहरू पनि एकढिक्का भएर लाग्नुस्, पार्टीमा देखिएको विवाद सहमतिमा टुंग्याउने अठोट हामीले गरेका छौँ । पार्टी कुनै पनि हालतमा फुट्दैन । अब माओवादीको जनलहर ल्याउन तपाईंहरू लाग्नूस् ।'
प्रशिक्षणमा उपाध्यक्ष मोहन वैद्य किरणले जति विवाद देखिए पनि पार्टी नफुट्ने बताएका थिए । 'सहमति नभएका विचार खुला रूपमा कार्यकर्तामाझ सबैले लैजानुपर्छ र बहस हुन जरुरी छ,' प्रशिक्षणमा किरणको भनाइ उद्धृत गर्दै एक सहभागीले भने, 'जति विवाद देखिए पनि पार्टी भने फुट्ने छैन । सम्मानजनक रूपमा जनसेनाको समायोजन गर्नुपर्छ, त्यसो भएन भने अहिले भनिएको एकता देखावटी हुनेछ ।'
अर्का उपाध्यक्ष तथा प्रधानमन्त्री डा. बाबुराम भट्टराईले आफूहरू पार्टी एकताको सन्देश दिन प्रशिक्षणमा आएको बताए । माओवादीकै नेतृत्वमा शान्ति र संविधान निर्माण टुंगोमा पुर्‍याउनुपर्ने पनि उनको भनाइ थियो ।
'अहिले पार्टीको एकताको सन्देश दिन संयुक्त रूपमा आएका छौँ । पार्टीमा देखिएका विवादहरू त्रिपक्षीय रूपमै बसेर समाधान गर्ने र जोडतोडका साथ कार्यान्वयन गर्न सहमति बनेको छ ।' प्रशिक्षणमा डा. भट्टराईले भने, 'माओवादीकै नेतृत्वमा शान्ति र संविधानलाई टुंगोमा पुर्‍याउनुपर्दछ । माओवादी नेतृत्वविनाको सरकार भएमा जनमुखी तथा जनयुद्धको भावनाअनुसारको संविधान निर्माण गर्न कठिन हुनेछ ।'
प्रशिक्षण कार्यक्रममा शीर्ष नेताहरूले पार्टीमा भएको सहमति, प्रस्तावहरू तलैसम्म छलफल गर्नेलगायत विषयबारे पनि प्रशिक्षण दिएका थिए । प्रशिक्षणमा मन्त्रीहरू टोपबहादुर रायमाझी, लोकेन्द्र विष्टलगायत नेताहरू आएका थिए । दुई दिनसम्म चल्ने प्रशिक्षणमा मगरातका नौ जिल्ला र तमुवानका आठ जिल्ला गरी १७ जिल्लाका करिब सात सय राज्यसमितिका सदस्य सहभागी छन् ।
प्रशिक्षण कार्यक्रममा सहभागी हुनुअघि पत्रकार महासंघ पाल्पाले गरेको पत्रकार सम्मेलनमा पनि प्रचण्डले शान्ति र संविधान निर्माणका लागि पार्टी एकढिक्का भएर अघि बढ्ने बताएका थिए । एकताको सन्देश लिएर पाल्पा आएको उनको भनाइ थियो ।
पत्रकार सम्मेलनमा प्रधानमन्त्री डा. भट्टराईले एक साताभित्र अर्काे 'ब्र्रेक थ्रु' हुने उल्लेख गर्दै आफ्नै नेतृत्वको सरकार राष्ट्रिय सहमतिको सरकारमा परिणत हुने बताए । यसबारे दलहरूसँग छलफल भइरहेको उनले जानकारी दिए ।
प्रधानमन्त्री डा. भट्टराईले 'जनसत्ता' लाई वैधानिकता नभई द्वन्द्वकालमा भएका लेनदेनलाई कसरी औपचारिकता दिने भन्ने विषयमा मात्र सरकारले निर्णय गरेको बताए । दलहरूको आपत्तिप्रति छलफल गरेर अगाडि बढ्ने पनि उनको भनाइ थियो । केही दिनअघि सरकारले द्वन्द्वकालमा माओवादी 'जनसत्ता'ले गरेका जग्गासम्बन्धी निर्णयलाई कानुनी मान्यता दिने निर्णय गरेको थियो ।
यसैगरी प्रधानमन्त्री डा. भट्टराईले बाध्यताले पेट्रोलियम पदार्थको मूल्यवृद्धि गरिएको बताए । अन्तर्राष्ट्रियस्तरमै पेट्र्रोलियम पदार्थको मूल्यवृद्धि भएकाले केही रकम मात्र बढाएको उल्लेख गर्दै उनले अझै पनि आयल निगमको मासिक घाटा एक अर्ब रुपैयाँ हुने गरेको दाबी गरे ।    
यसैबीच, पेट्रोलियम पदार्थको मूल्यवृद्धिको विरोधमा आन्दोलित विद्यार्थीले प्रधानमन्त्री डा. भट्टराईलाई कालो झन्डा देखाएका छन् । अनेरास्वियु, नेविसंघ र अनेरास्वियु छैटौँ समर्थित विद्यार्थीले प्रधानमन्त्रीलाई कालो झन्डा देखाएका हुन् ।