देउवाले बोलाए जिल्ला

25/01/2012 08:32:00 बालकृष्ण अधिकारी/नयाँ पत्रिका

Font size:

काठमाडौं, १० माघ
सभापति सुशील कोइराला र वरिष्ठ नेता शेरबहादुर देउवा पक्षको विवादले कांग्रेसभित्र थप रँडाको मच्चाउँदै छ । पार्टीभित्र आफ्नो पकड बलियो बनाउन दुवै पक्ष 'बार्गेनिङ'मा उत्रिएका छन् । दुवै पक्ष छुट्टाछुट्टै छलफलमा जुटेका छन् ।
सभापति कोइरालाले तत्काल भ्रातृ संस्था र पार्टीका विभाग गठन गर्न सहमतिको प्रस्ताव सर्तसहित देउवासमक्ष पुर्‍याएका छन् भने देउवाले कोइरालाको प्रस्तावलाई ठाडै अस्वीकार गरेका छन् । संस्थापन पक्षलाई दबाब दिन देउवाले फागुन पहिलो साता आफूपक्षीय जिल्ला सभापतिको भेला बोलाएका छन् । त्यसअघि उनले आफूनिकट केन्द्रीय सदस्य र सभासद्हरूको भेला बोलाएर छलफल गर्ने भएका छन् ।
सभापति कोइरालाले मंगलबार देउवापक्षीय नेता खुमबहादुर खड्का र डा. मिनेन्द्र रिजालमार्फत भ्रातृ संस्थाहरूको विवाद मिलाउन र पार्टी विभाग गठन गर्न देउवालाई प्रस्ताव गरेका थिए । संसदीय बोर्ड गठन र बाँकी केन्द्रीय सदस्य मनोनयन त्यसपछि मात्रै गर्ने सभापतिको प्रस्ताव थियो । देउवाले भने सभापतिको प्रस्ताव अस्वीकार गरेका छन् । विवादका कारण महाधिवेशन भएको डेढ वर्ष बितिसक्दा पनि कांग्रेसले ५ केन्द्रीय सदस्य अझै मनोनीत गर्न सकेको छैन ।
स्रोतका अनुसार सभापति कोइरालाले तरुण दल र महिला संघको नेतृत्व देउवालाई दिने प्रस्ताव गरेका छन् । त्यस्तै, पार्टीको परराष्ट्र र संगठनबाहेकका विभाग पनि सहमतिमा गठन गर्ने कोइरालाको प्रस्तावमा छ । कांग्रेसको विधानमा ३२ वटा विभागको व्यवस्था छ । विधानः प्रशिक्षण विभागको प्रमुख पार्टी उपसभापति हुने गर्छ ।
वरिष्ठ नेता देउवाले भने सबै विवाद प्याकेजमै हल गरिनुपर्ने अडान लिएका छन् । यसका लागि सभापति कोइराला सकारात्मक भए आफू सहमतिका लागि तयार रहेको देउवाले आफूनिकट नेतालाई बताएका छन् । सभापति कोइरालाको प्रस्तावपछि देउवाले मंगलबार नै आफ्नो निवास बुढानीलकण्ठमा आफूनिकट केही वरिष्ठ नेतासित यसबारे छलफल पनि गरेका छन् ।
देउवा निवासमा भएको छलफलमा विमलेन्द्र निधि, गोपालमान श्रेष्ठ, पूर्णबहादुर खड्का, गोविन्दराज जोशीलगायत करिब

एक दर्जन नेताको उपस्थिति थियो । छलफलपछि देउवाले सभापति कोइरालासित स्पष्ट कुराकानी गर्न गोपालमान श्रेष्ठसहितका तीन नेतालाई जिम्मा दिएका छन् ।
स्रोतका अनुसार कोइरालाको प्रस्तावमाथि छलफल गर्न तथा आगामी रणनीति बनाउन देउवाले १७ र १८ माघमा आफूनिकट केन्द्रीय सदस्य र सभासद्हरूको भेला बोलाएका छन् । त्यसको निष्कर्षमाथि थप छलफल गर्न ३ र ४ फागुनमा जिल्ला सभापतिहरूको भेला बोलाइएको छ । जिल्ला सभापतिहरूको भेलाको प्रबन्ध मिलाउन ललितपुरका सभापति मदन आमात्य र सिन्धुपाल्चोकका सभापति मोहन बस्नेतलाई जिम्मा दिइएको स्रोतको दाबी छ ।
देउवापक्षीय भेलामा सहभागी एक नेताका अनुसार देउवाले भ्रातृ संस्थालाई मिलाएर गठन गर्ने भए नेतृत्व पाउने पक्षले संगठनभित्र सामान्य बहुमत पनि पाउनुपर्ने अडान राखेका छन् । कोइरालाले भने विघटन हुनुअघि संगठनमा जुन पक्षको नेतृत्व थियो, अहिले पनि त्यही पक्षलाई नेतृत्व दिने प्रस्ताव गरेका छन् ।
यता सभापति कोइराला पक्षले पनि केन्द्रीय सदस्य आनन्दप्रसाद ढुंगानाको भक्तपुरस्थित घरमा छुट्टै छलफल गरेको छ । देउवा सहमतिमा नआए बहुमतबाटै भए पनि निर्णय गरेर अगाडि बढ्ने मनस्थिति संस्थापन पक्षको छ । सभापति कोइरालासमेत उपस्थित रहेको छलफलले सहमतिका लागि पहल गर्ने र देउवा सहमतिमा नआए बहुमतको निर्णयबाटै भए पनि भ्रातृ संस्थाहरू र विभाग गठन गर्ने निष्कर्ष निकालेको छ । तर, यसबारे नेताहरू औपचारिक रूपमा केही बोल्न चाहँदैनन् ।
देउवा निवासमा भएको छलफलमा सहभागी केन्द्रीय सदस्य गोपालमान श्रेष्ठले संस्थापन पक्षले सबै विवाद एकैपटक हल गर्नुपर्ने बताए । 'मूलभूत कुरा नमिलाई मसिना कुरामा सहमति गरेर केही हुन्न । खण्डखण्ड गरेर विवाद मिलाउनुको सट्टा एकैपटक समाधान खोजिनुपर्छ', उनले नयाँ पत्रिकासित भने । सबै विवाद नमिलाए पार्टी अर्को महाधिवेशनमा जाँदा पनि द्विविधा र विवाद हुने उनले बताए ।
पार्टीभित्रको विवाद मिलाउन आफूलाई सभापति कोइराला वा वरिष्ठ नेता देउवा जोसुकैले पहल गर्न भने पनि तयार रहेको नेता श्रेष्ठले बताए । 'विवाद मिलाउन सभापतिले भने पनि देउवाले भने पनि म तयार नै छु । सेतुको काम गर्न म जहिले पनि तयार छु,' उनले भने ।
पार्टीभित्रको विवाद मिलाउन सभापति कोइरालाले यसअघि देउवालाई मंसिर महिनाभित्र मनोनीत गर्ने केन्द्रीय सदस्यहरू, विभाग, संसदीय बोर्डमा राख्नुपर्ने सदस्यहरू र भ्रातृ संस्थाका नेतृत्वको नाम दिन भनेका थिए । तर, देउवाले अहिलेसम्म नाम दिएका छैनन् । त्यस्तै, संस्थापन पक्षलाई दबाब दिन देउवाले दसैं लगत्तै बोलाउने भनिएको जिल्ला सभापतिहरूको भेला पनि अहिलेसम्म बोलाइएको छैन ।